Jaipur : ರಾಜಸ್ಥಾನ್ ರಾಯಲ್ಸ್(Rajasthan Royals) ವಿರುದ್ಧ ನಡೆದ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ (Chennai Super Kings) ವಿರುದ್ಧ ರಾಜಸ್ಥಾನ ರಾಯಲ್ಸ್ 32 ರನ್‌ ಗಳ ಭರ್ಜರಿ ಜಯ ಸಾಧಿಸಿದೆ.
ಈ ಮೂಲಕ ಐಪಿಎಲ್‌ (IPL) ಅಂಕ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ಕೆಳಗೆ ಇಳಿದು, ರಾಜಸ್ಥಾನ್ ಮೊದಲ ಸ್ಥಾನ ಅಲಂಕರಿಸಿದೆ. ಟಾಸ್‌ ಗೆದ್ದು ಮೊದಲು ಬ್ಯಾಟ್‌ ಮಾಡಿದ ರಾಜಸ್ಥಾನ 202 ರನ್‌ ಗಳಿಸಿತ್ತು. ಗೆಲ್ಲಲು 203 ರನ್‌ ಗಳ ಕಠಿಣ ಸವಾಲು ಪಡೆದ ಚೆನ್ನೈ ತಂಡವು 20 ಓವರ್‌ ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 170 ರನ್‌ ಗಳಿಸಿ ಸೋಲು ಕಂಡಿದೆ.
ಈ ಪಂದ್ಯವನ್ನು ಗೆಲ್ಲುವ ಮೂಲಕ ರಾಜಸ್ಥಾನ ಅಂಕಪಟ್ಟಿಯಲ್ಲಿ 10 ಅಂಕ (0.939 ನೆಟ್‌ ರನ್‌ ರೇಟ್‌) ಪಡೆದು ಮೊದಲ ಸ್ಥಾನಕ್ಕೆ ಜಿಗಿದಿದೆ. 10 ಅಂಕ ಪಡೆದಿರುವ ಚೆನ್ನೈ 0.376 ನೆಟ್‌ ರನ್‌ ರೇಟ್‌ನೊಂದಿಗೆ ಮೂರನೇ ಸ್ಥಾನಕ್ಕೆ ಜಾರಿದೆ. ಗುಜರಾತ್ ತಂಡವೂ 10 ಅಂಕ 0.580 ನೆಟ್‌ ರನ್‌ ರೇಟ್‌ನೊಂದಿಗೆ ಎರಡನೇ ಸ್ಥಾನದಲ್ಲಿದೆ.
ಚೆನ್ನೈ ತಂಡವು ಆರಂಭದಲ್ಲಿ ಉತ್ತಮವಾಗಿತ್ತು. ಮೊದಲ ವಿಕೆಟ್ ಗೆ 42 ರನ್‌ ಗಳು ಬಂದಿದ್ದವು. 1 ವಿಕೆಟ್ ನಷ್ಟಕ್ಕೆ 69 ರನ್‌ ಗಳಿಸಿ ಉತ್ತಮ ಸ್ಥಿತಿಯಲ್ಲಿದ್ದ ಚೆನ್ನೈ ನಂತರ 4 ರನ್‌ ಗಳಿಸುವಷ್ಟರಲ್ಲಿ ಪ್ರಮುಖ 3 ವಿಕೆಟ್ ಕಳೆದುಕೊಂಡಿತು. ಚೆನ್ನೈ ಪರ ಋತುರಾಜ್‌ ಗಾಯಕ್ವಾಡ್ 47 ರನ್‌(29 ಎಸೆತ, 5 ಬೌಂಡರಿ, 1 ಸಿಕ್ಸರ್), ಶಿವಂ ದುಬೆ 52 ರನ್‌(33 ಎಸೆತ, 2 ಬೌಂಡರಿ, 4 ಸಿಕ್ಸರ್), ಮೊಯಿನ್‌ ಅಲಿ ಮತ್ತು ರವೀಂದ್ರ ಜಡೇಜಾ ತಲಾ 23 ರನ್‌ ಗಳಿಸಿದ್ದರು.
ಉತ್ತಮ ಬೌಲಿಂಗ್‌ನಿಂದ ಚೆನ್ನೈ ಬ್ಯಾಟರ್‌ಗಳನ್ನು ರಾಜಸ್ಥಾನ ಬೌಲರ್‌ಗಳು ಕಟ್ಟಿ ಹಾಕಿದರು. ಆಡಂ ಜಂಪಾ 3 ವಿಕೆಟ್, ಅಶ್ವಿನ್‌ 2 ವಿಕೆಟ್ ಪಡೆದರೆ ಕುಲದೀಪ್‌ ಯಾದವ್‌ 1 ವಿಕೆಟ್ ಪಡೆದಿದ್ದರು. ಟಾಸ್‌ ಗೆದ್ದು ಬ್ಯಾಟಿಂಗ್‌ ಮಾಡಿದ ರಾಜಸ್ಥಾನ ಉತ್ತಮ ಆರಂಭ ಪಡೆದಿತ್ತು. ಯಶಸ್ವಿ ಜೈಸ್ವಾಲ್‌ 77 ರನ್‌, ಜೋಸ್‌ ಬಟ್ಲರ್‌ 27 ರನ್‌, ಧ್ರುವ್ ಜುರೆಲ್ ಔಟಾಗದೇ 34 ರನ್‌, ದೇವದತ್ತ ಪಡಿಕ್ಕಲ್‌ ಔಟಾಗದೇ 27 ರನ್‌ ಸಿಡಿಸಿದರು ಪರಿಣಾಮವಾಗಿ ರಾಜಸ್ಥಾನ 5 ವಿಕೆಟ್ ನಷ್ಟಕ್ಕೆ 202 ರನ್‌ ಗಳಿಸಿತು. ರಾಜಸ್ಥಾನದ ಕೊನೆಯ 50 ರನ್‌ 21 ಎಸೆತಗಳಲ್ಲಿ ಬಂದಿದ್ದವು.
