ಸುಳ್ಳು ದಾಖಲೆಗಳನ್ನು ತೋರಿಸಿ ಹಿರಿಯ ಅಧಿಕಾರಿಯ ಸೋಗಿನಲ್ಲಿ ಖಾತೆಯೊಂದರಿಂದ 32 ಲಕ್ಷ ರೂ.ಗಳನ್ನು ದೋಚಿದ ಆರೋಪದ ಹಿನ್ನೆಲೆಯಲ್ಲಿ ಬ್ಯಾಂಕ್ ನೌಕರನೊಬ್ಬನನ್ನು ಬಂಧಿಸಲಾಗಿದೆ.
ಈ ಘಟನೆ ಮುಂಬಯಿನ ಮುಲುಂದರ್ ನಲ್ಲಿ ನಡೆದಿದೆ. ಬ್ಯಾಂಕ್ ಆಫ್ ಬರೋಡಾದ ಔಟ್ ಸೊರ್ಸಿಂಗ್ ಕೆಲಸ ಮಾಡುವ ವಿನೋದ್ ಎಂಬಾತ ಈ ಕೃತ್ಯ ಎಸಗಿದ್ದಾನೆ. ಜೂನ್ 14ರಂದು ಹೊಸದಾಗಿ ಠಾಣೆಗೆ ಹಿರಿಯ ಇನ್ಸ್ ಪೆಕ್ಟರ್ ಆಗಿ ಬಂದ ದತ್ತಾರಾಂ, ಪೇದೆ ಗೆ ಪೊಲೀಸರು ವಶಪಡಿಸಿಕೊಂಡಿರುವ ಖಾತೆಗಳ ಪರಿಶೀಲನೆ ಮಾಡಲು ಹೇಳಿದ್ದಾರೆ. ಆಗ ಖಾತೆಯೊಂದರಲ್ಲಿ ಕೇವಲ 32 ರೂ. ಇರುವುದು ಕಂಡು ಬಂದಿದೆ. ವಂಚನೆ ಪ್ರಕರಣದಲ್ಲಿ ಆಪಾದಿತನಿಂದ ವಶಕ್ಕೆ ಪಡೆದಿದ್ದ ಖಾತೆಯಲ್ಲಿ ಕಳೆದ ವರ್ಷ ಪಾಸ್ ಬುಕ್ ಪರಿಷ್ಕರಣೆ ಮಾಡಿದಾಗ 32 ಲಕ್ಷ ರೂ. ಇತ್ತು. ಆದರೆ, ಈಗಿಲ್ಲ ಎಂದು ಗಾಬರಿಗೊಂಡ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
ಆಗ ಮೇ 5ರಿಂದ 16ರ ನಡುವೆ ಇದೇ ಖಾತೆಯಿಂದ 33.26 ಲಕ್ಷ ರೂ.ಗಳನ್ನು ವರ್ಗಾವಣೆ ಮಾಡಿಕೊಂಡಿರುವ ವಿಚಾರ ಬ್ಯಾಂಕ್ ಸ್ಟೇಟ್ಮೆಂಟ್ ನಿಂದ ತಿಳಿದು ಬಂದಿದೆ. ಎಲ್ ಡಿ ಖಾರ್ಪಡೆ ಹೆಸರಿನ ವ್ಯಕ್ತಿಯೊಬ್ಬರು ಬ್ಯಾಂಕ್ ಗೆ ಬಂದು ಚೆಕ್ ಮೂಲಕ ಹಣವನ್ನು ಹಿಂಪಡೆದಿರುವುದು ತಿಳಿದು ಬಂದಿದೆ. ಚೆಂಬೂರಿನಲ್ಲಿರುವ ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ನಲ್ಲಿ ಯುವಿ ಫೈನಾನ್ಸ್ ಹೆಸರಿನ ಖಾತೆಗೆ ಹಣ ವರ್ಗಾವಣೆಯಾಗಿರುವುದು ಕೂಡ ತಿಳಿದು ಬಂದಿದೆ.
ಈ ಕುರಿತು ಪೊಲೀಸರು ತನಿಖೆ ಕೈಗೊಂಡಾಗ ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ವಿನೋದ್ ತನ್ನ ಔಟ್ ಸೋರ್ಸಿಂಗ್ ಕೆಲಸದ ಮೂಲಕ ಬ್ಯಾಂಕಿನ ಡೇಟಾಬೇಸ್ ಗೆ ಆಕ್ಸೆಸ್ ಪಡೆದುಕೊಂಡಿದ್ದ. ಈ ಮೂಲಕ ನಿಷ್ಕ್ರಿಯಗೊಂಡ ಬ್ಯಾಂಕ್ ಖಾತೆಗಳ ವಿವರಗಳನ್ನು ಪಡೆದುಕೊಂಡ ವಿನೋದ್, ಪಾನ್ ಹಾಗೂ ಆಧಾರ್ ಕಾರ್ಡ್ ಗಳನ್ನು ಬಳಸಿಕೊಂಡು ಎಸ್.ಐ. ಖಾರ್ಪಡೆ ಹೆಸರಿನಲ್ಲಿ ಖಾತೆ ತೆರೆದು ದಾಖಲೆಗಳ ಮೇಲೆ ತನ್ನ ಪೋಟೋ ಹಾಕಿಕೊಂಡಿದ್ದಾನೆ ಎನ್ನಲಾಗಿದೆ. ಆರ್ಥಿಕ ವಂಚನೆ ಪ್ರಕರಣದ ದಾಖಲೆಗಳ ಮೇಲೆ ಪೊಲೀಸ್ ಅಧಿಕಾರಿಗಳು ನಿಗಾ ಇಡದ ಕಾರಣ ಹೀಗಾಗಿದೆ ಎನ್ನಲಾಗಿದೆ.
